“𝘜𝘯 𝘩ò𝘧𝘪 𝘥𝘪 𝘰𝘱𝘰𝘳𝘵𝘶𝘯𝘪𝘥𝘢𝘵”: 𝐒𝐃𝐊𝐊 𝐭𝐚 𝐢𝐧𝐢𝐬𝐢á 𝐩𝐫𝐨𝐲𝐞𝐤𝐭𝐨 𝐚𝐠𝐫𝐚𝐫𝐢𝐨 𝐩𝐚 𝐤𝐥𝐢𝐞𝐧𝐭𝐞𝐧𝐚𝐧

“𝘜𝘯 𝘩ò𝘧𝘪 𝘥𝘪 𝘰𝘱𝘰𝘳𝘵𝘶𝘯𝘪𝘥𝘢𝘵”:
𝐒𝐃𝐊𝐊 𝐭𝐚 𝐢𝐧𝐢𝐬𝐢á 𝐩𝐫𝐨𝐲𝐞𝐤𝐭𝐨 𝐚𝐠𝐫𝐚𝐫𝐢𝐨 𝐩𝐚 𝐤𝐥𝐢𝐞𝐧𝐭𝐞𝐧𝐚𝐧
WILLEMSTAD; – SDKK – Sentro di Detenshon i Korekshon Kòrsou a kuminsá ku un paso nobo i inovativo den su esfuersonan pa resosialisá klientenan den e instituto. Ku e meta pa reforsá e instituto mes, stimulá integrashon laboral i kontribuí na un integrashon sostenibel, SDKK a dal un stap pa pone e proyekto agrario ku ta habri un mundu di oportunidat pa e hende ku ta den e instituto.
Despues di algun luna di preparashon i planifikashon ku hopi kuido, den luna di òktober 2025, e grupo di agrikultura di SDKK, huntu ku e partnernan Soltuna i AVB, a duna inisio ofisial na e inisiativa nobo aki. E proyekto ta forma parti di un strategia mas amplio ku ta mira no solamente riba fortalesé kapasidatnan di e institushon mes, sino tambe riba krea futuro pa e klientenan den manera ku ta responsabel i útil pa komunidat.
𝙐𝙣 𝙝ò𝙛𝙞 𝙠𝙪 𝙩𝙖 𝙗𝙞𝙧𝙖 𝙪𝙣 𝙨𝙠𝙤𝙡 𝙙𝙞 𝙗𝙞𝙙𝙖
E idea prinsipal tras di e proyekto aki ta pa transformá parti di e tereno grandi di SDKK den un hòfi di oportunidat. Un hòfi kaminda detenidonan por haña trabou, haña konosementu, i haña motivashon pa desaroyá nan mes. Pa hopi hende, agrikultura por ta un profeshon ku ta duna satisfakshon i stabilidat, pero tambe un forma di meditashon i rekonektá ku naturalesa.
Durante e fase di prueba, e detenidonan a planta un kolekshon variá di berdura i fruta: promentòn, tomati, pampuna, roibit, banana, batata, maishi, turmeric, lamunchi, i yerbanan di kushina manera sèlder i orégano. E resultado a mustra ku e tereno ta fértil i ku e trabou ta posibel pa sigui ekspandé.
E plan ta ku tur fruta i berdura ku ta bira disponibel lo sirbi pa kushina di SDKK mes. Esaki tin dos benefisio importante:
1. Baha gastu den kushina – na momentu ku usa produkto di e hòfi, lo no mester kumpra produkto di afó.
2. Duna mas balor na kuminda – pa motibu ku nan ta usa produkto lokal, fresku i lo balorá nan propio esfuerso den e hòfi.
E produkto ku ta kosechá lo sirbi prinsipalmente pa kushina di SDKK, ku ta yuda pa baha gastu i duna mas balor na kuminda di klientenan. Na mes momentu e proyekto ta duna oportunidat pa e persona ku ta partisipá por haña konosementu útil riba agrikultura, ku nan por uza despues ku nan sali for di e instituto, sea pa yuda nan mes i nan famia òf pa habri portanan den merkado laboral.
SDKK ta mira e hòfi manera un “skol di bida” kaminda klientenan ta siña disiplina, trahamentu den grupo i téknikanan práktiko, ku por inspirá nan pa sigui un kaminda mas positivo. Den e manera aki, e instituto ta fortalesé su kompromiso pa duna un segundo oportunidat i pa kontribuí den seguridat i bienestar di komunidat.
Ku e paso nobo aki, SDKK ta transmití un mensahe kla: meskos ku naturalesa ta renasé, hende tambe por haña un komienso nobo ku speransa i balor.
– 𝘋𝘢𝘯𝘬𝘪 𝘴𝘱𝘦𝘴𝘪𝘢𝘭 𝘯𝘢 𝘧𝘰𝘯𝘥𝘰 𝘥𝘪 𝘬𝘳𝘪𝘮𝘪𝘯𝘢𝘭𝘪𝘥𝘢𝘵 𝘱𝘢 𝘦 𝘴𝘰𝘴𝘵𝘦𝘯 𝘯𝘢 𝘦 𝘱𝘳𝘰𝘺𝘦𝘬𝘵𝘰 𝘢𝘬𝘪.-