Parlamento di Kòrsou Deliberashon ku Minister di Enseñansa, Siensia, Kultura i Deporte enkuanto e fecha konmemorativo di 2 di yüli.

Djárason 29 april 2026, e reunion publiko a kuminsá ku tratamentu di punto un di agènda: Dokumentonan ku a drenta. Basá riba un karta ku a drenta di Minister Presidente sr. Gilmar Pisas, proponiendo pa informá Parlamento únikamente na momento ku e ministernan ta den eksterior pa motibunan di trabou i no mas pa motibunan privá, Miembro di Parlamento sra. Giselle Mc William a presentá un proposishon pa trata e karta aki den un komishon Sentral. Parlamento a sostené e proposishon aki.

Seguidamente a kontinuá ku punto dos di agènda, kual ta Deliberashon ku Minister di Enseñansa, Siensia, Kultura i Deporte enkuanto e fecha konmemorativo di 2 di yüli. Presidente di Parlamento sr. Fergino Brownbill a duna minister di ESKD sr. Sithree van Heydoorn e oportunidat pa duna un introdukshon i despues a pasa palabra na representantenan di OWCS pa duna un presentashon relashoná ku e tópiko. Despues di e presentashon, Visepresidente di Parlamento, sr. Ramón Yung, a habrí e promé tanda di 15 minüt, pa Miembronan di Parlamento por hasi pregunta.

Minister Van Heydoorn a pidi espasio pa por formulá e kontestanan hasí dor di e Miembronan di Parlamento den promé tanda.

Na final, visepresidente sr. Ramón Yung a skòrs e reunion te un próksimo aviso.