Parlamentario Rennox Calmes   KÒRSOU TA PAIS DI PAS. MIN PRES LAGA MUNDU SA KÒRSOU SU POSISHON DEN E GUERA NA OROPA.

 

Parlamentario Rennox Calmes

 

KÒRSOU TA PAIS DI PAS. MIN PRES LAGA MUNDU SA KÒRSOU SU POSISHON DEN E GUERA NA OROPA.

 

Hulanda hinkando nos den problema atrobe (Venezuela). Mundu mester sa,nos no ta nan.

Hulanda ta yuda Ukrania sin niun eksigensia. Pa Kòrsou si tin Coho den pandemia.

 

Mundu su bista kompletu ta riba e situashon entre Rusia i Ukrania. E echo ku Hulanda ta forma parti di Oropa, pero tambe un di e fundadonan di OTAN ta hasi ku tardi of trempan Hulanda mester fiha su posishon. Ya kaba ta konosí ku Hulanda a manda avion nan pa patruyá ost oropa i tambe konforme e página di wep http://www.nu.nl i un karta fechá 26 febrüari 2022 ku minister di asuntunan di eksterior i minister di defensa a manda pa presidente di “tweede kamer”, konseho di minister di Hulanda a aprobá pa duna Ukrania ekiponan militar manera arma pa frankotirado, munishon, radar i chaleko kontra bala, yudansa humanitario i asta manda trupanan pa e pais Rumania. Ku e desishon aki Hulanda no sa kon Rusia lo tuma esaki. Na e kanal BBC por mira un video kaminda presidente di Rusia ta bisa bon klá ku esun ku interferí o menasá Rusia, lo sufri e konsekuensianan mesora na un manera ku nunka prome nan a yega di eksperensia.

 

Tumando nota di esaki nan tur i ku Kòrsou ta forma parti di Reino Hulandes, Trabou pa Kòrsou ta di opinion ku Minister Presidente mester laga Hulanda i mundu den su totalidat sa ku Kòrsou ta un pais di pas i ku Kòrsou no ta interesá den mete den e situashon entre Rusia i Ukrania.

 

Tin algun aspekto masha importante pa Kòrsou tene kuenta ku ne.

 

  1. Un di nan ta ku Reino Hulandes ta kasi un situashon úniko na mundu. Pues mundu no ta kompronde nos posishon i relashonnan den reino. Mundu ta pensa ku nos ta Hulanda. Sigun mundu ta Hulanda ta goberná pa nos.
  2. Geopolítika. Ta konosí ku Venezuela i Rusia tin bon relashon ku otro. Den pasado resien èks-minister presidente di Kòrsou, Sr. Ruggenaath, a rekonosé Guaido komo presidente di Venezuela, pero te awe presidente Maduro tei. E desishon aki a mustra ku Kòrsou ta aliado ku Merka i nos a laga nos rumannan Venezolano kai. Esaki a daña e relashon ku pa hopi aña nos a bin ta konstruí entre Kòrsou i Venezuela kual tambe tin ku fronteranan ta sera te ku dia di awe. Merka mes a baha bai laga nos sin petrolio i pone ku nos ekonomia a kolapsá i den tur kas na Kòrsou nos ta sinti e subida di gas, gasolin i otro produktonan.
  3. Hulanda ta manda yudansa pa Ukrania sin niun tipo di eksigensia, pero pa Kòrsou si den Pandemia a bini ku yen eksigensia i Coho. No tin mas siegu ku esun ku no ke mira.

 

Trabou pa Kòrsou TPK a dirigí karta ku pregunta pa minister presidente relashoná ku e situashon aki.

 

This site uses Akismet to reduce spam. Learn how your comment data is processed.

%d bloggers like this: