Alumnonan huntu ku Minister S. van Heydoorn a sera konosí ku Carnival Celebration

WILLEMSTAD – Riba invitashon di Carnival Corporation i Curaçao Ports Authority (CPA) un total di 70 alumno (inkluso dosente i kabes di skol) huntu ku Minister di Enseñansa, Siensia, Kultura i Deporte (ESKD) sr. Sithree van Heydoorn a haña un rekorido riba un di e barku Carnival Celebration.

Minister huntu ku Direktor di CPA sr. Albert Zwueste, Kolaborador di Relashonnan Públiko i Komunikashon di CPA sra. Sau Bridgewater i e alumnonan di skolnan di fundeshi di Advent Bonam, Marnix, Angela Jesserun/Chema Maduro, VSBO/AGO Geertuida, Maris Stella VSBO, Nildo Pinto SBO i VSBO New Song College a sera konosí mas di aserka ku e aktividatnan ku tin riba e barku. Minister di ESKD sr. Sithree van Heydoorn a hasi entrega di un regalo na e kapitan di e barku sr. Stefano Bonica i na Direktor di CPA sr. A. Zwueste.

Minister sigur ta bai sigui traha huntu ku CPA i Carnival Cruises pa den futuro tin mas aktividat huntu den kuadro di desaroyo di nos alumnonan pa ku e área di turismo i horeka. Por mira bèk riba un bishita hopi agradabel i edukativo pa e alumnonan ku espesialmente tin interes pa e área turístiko, hospitalidat i horeka.

—

KOMUNIKASHON

Pa mas potrèt por bishitá: Bishita na Carnival Celebration