MAN-PIN KOMPROMETÉ KU NOS GRANDINAN, ADULTO MAYÓ NO TEI PA PIKI KÙP DESPUES DI FIESTA

MAN-PIN KOMPROMETÉ KU NOS GRANDINAN

ADULTO MAYÓ NO TEI PA PIKI KÙP DESPUES DI FIESTA

Willemstad, Kòrsou – Den e ultimo periodo di gobernashon, poko a ser hasí pa nos grandinan, ku ta forma un parti grandi di nos komunidat. No a oumentá AOV, ni a mara subida di AOV na subida di preis na Kòrsou. Ainda kòrtamentu den penshun di amtenar ta riba mesa, esta pa kita 10 % di “duurtetoeslag” ku ta un suma ku ta kompletá e penshun. Grandinan ku ta dependé di AOV so a bai hopi atras, bibando den mas pobresa den un pais ku tur kos di promé nesesidat a bira hopi karu. E manera sin kuenta ku ta trata nos grandinan ta indikashon di kon nos gobièrnu ta mira hende di edat.  Poko dia ei un parlamntario a manda grandinan bai piki kup despues di nan fiesta.

Partido MAN-PIN ta komprometé pa introdusí un reforma integral ku lo pone bienestar, protekshon i kalidat di bida di nos grandinan komo prioridat. Resientemente MAN-PIN a firma un manifesto ku su kompromiso ku nos adulto mayónan. E manifesto ta enfatisá ku nos grandinan a kontribuí enormemente na progreso di nos isla i mester disfrutá di un bida digno i inklusivo.

MAN-PIN ya a introdusí un penshun general banda di e AOV, i ta garantisá ku tur hende grandi di 65+ tin un entrada mínimo pa biba dignamente (f. 1.500). Esei ta nifiká ku poko poko lo oumentá AOV. Tambe lo lòs e penshun di penshonadonan di APC for di e presupuesto di gobiernu i lag’e mará na solamente subida di preis (indeksashon) i forsa di e fondo. Ademas nos lo introdusí un tarheta spesial ku ta duna mensualmente te Naf. 350,-  deskuento riba kompra di komestibel salú den supermerkado; transporte públiko gratis pa 65+;rebaho riba impuesto i prima médiko; i sòru pa supsidio di koriente i awa pa grandinan ku entrada menos ku e nivel nesesario di entrada pa biba dignamente.

MAN-PIN ta introdusí un sistema di kuido pagabel i di kalidat, sea na kas òf den un ambiente residensial, inkluyendo un programa spesífikamente diseñá pa grandinan ku ke keda den nan propio kas. Parti di esaki ta redukshon supstanshal di impuesto riba kas (OZB) pa para a abusu di grandinan ku a traha duru pa yega na nan bibienda propio mester keda paga impuesto riba nan propiedat ora ku nan entrada ta menos.

Nos lo garantisá sosten adekuá pa dunadó di kuido, kreá sentro di salú aksesibel den bario i duna prioridat na intervenshon trempan,  prevenshon di malesa i stimulashon di salú. Pa grandinan ku ta biba den kasnan di kuido, MAN-PIN lo introdusí kòntròl rigoroso pa protehá nan bienestar i seguridat. E lei di labizjan lo keda aktivá pa nos grandinan tin e medionan nesesario pa biba den nan mes ambiente.

MAN-PIN ta rekonosé e importansia di bibienda adaptá i aksesibel pa grandinan. Lo perkurá pa personanan di 55+ risibí prioridat den mantenshon di kasnan di FKP, fasilitá transporte spesial di porta-pa-porta i mehorá infrastruktura manera parada di bùs ku protekshon, zebrapad i drèmpel pa prevení aksidente i akomodá nos grandinan. Lo atende e problema di kacho den bario ku ta ataká nos grandinan.

Ta stòp diskriminashon kontra grandinan, inkluso duna preferensia pa atendé grandinan personalmente – no digital- na servisio i lokètnan di gobièrnu. Nos lo fasilitá kampañanan públiko di konsientisashon riba envehesimentu salú i edukashon digital, i garantisá partisipashon aktivo di nos grandinan den Konsehonan di Bario i tambe duna Konseho di Grandinan partisipashon den maneho pa grandinan.

MAN-PIN ta konsiderá ku e reformanan nesesario ta un obligashon moral i sosial pa asina rekonosé i honra e trabou i sakrifisio di nos grandinan.

Nos ta invitá komunidat kompletu pa votá MAN-PIN dia 21 di mart pa realisá e kambionan vital aki den benefisio di tur grandinan na Kòrsou.